好報好報，唔到你唔服！
隨《太陽報》附送嘅《好報》創刊以來好評如潮，到底好到乜嘢程度呢？賣花讚花香你就話吹水唔抹嘴啫，不如睇睇讀者嘅真實反應吖。尋日星期五又係《好報》出版嘅大喜日子，今次加料炮製，出夠兩冊，全港超過一百個地點免費派發，你估下需時幾耐先至派完吖嗱？答案係不足一小時，部分地點更加出現報紙未到已經有人排隊輪候嘅感人場面。喂，幾十萬份《好報》一粒鐘之內派完喎，而且唔係好似其他爛鬼免費報紙咁樣「一人一疊」任攞唔嬲，咁實際嘅讀者反應足以說明《好報》到底有幾好啦，好到一個程度就係唔睇會覺得走寶囉！
冇錯，功夫茶確係賣花讚花香，事關《好報》作為一朵嬌艷欲滴嘅鮮花真係香噴噴。其實唔止功夫茶大讚特讚o架，外界口碑同樣讚不絕口。好似尖沙咀八十後李先生咁吖，佢大讚今期嘅分冊形式令到內容更加清晰鮮明。至於另一位讀者陳小姐就話嘞，兩冊內容極具話題性之餘，資料亦係非常詳盡，好似第一冊嘅「山雲戀」同「飯局風波」，以及第二冊嘅「洗黑錢內幕」都好有深度好立體。
各位親愛嘅讀者，萬一閣下十分不幸行慢咗兩步而攞唔到精彩絕倫嘅《好報》，未必明白李先生同陳小姐講緊乜嘢，咁就等功夫茶再講清楚少少。係嘞，今期《好報》猛料大放送，由原本嘅一冊增加至兩冊，目的當然係回饋熱烈捧場嘅讀者啦。一刊兩冊定位清晰，第一冊以報道娛樂新聞為主，第二冊主打政經及潮流品味資訊，提供堅過石堅嘅獨家猛料。
之前捧過場嘅讀者都知道，《好報》嘅娛樂新聞極盡八卦之能事，其實時事報道完全唔失禮o架，例如今期獨家披露嘅封面故事「澳門變超級洗錢機」，揭露咗不少鮮為人知嘅內幕，涉及薄熙來案以及中央欽差，睇完包保你話大開眼界。
讀者讚不絕口自然令到廣告客戶笑到見牙唔見眼，原因好簡單，有讀者即係有商機，喺《好報》落廣告先至收到訊息廣傳嘅效果。唔講大家可能唔知，適逢聖誕新年臨近，《好報》出現咗爭位落廣告嘅情況。意思即係話，廣告客戶認為《好報》內容豐富、設計醒目又印刷精美，吸引到唔落廣告推銷自己嘅產品都唔得！
講到呢度，又係時候要同大家透露少少秘密。你知啦，《好報》人強馬壯嘅編採陣容好有創意o架，見到自己嘅親生寶貝大受歡迎，自然諗到加碼迎賓。講得再具體少少吖，《好報》有機會每周出兩期甚至更多，咁讀者就唔使每個禮拜望穿秋水等星期五先至能夠享受「好人有好報」嘅超凡樂趣。
《好報》一刊分兩冊，猛料又堅又夠八，今期派完，下期請早！