政情:會計界龔耀輝變做「長毛」

香港會計師公會尋日舉行一年一度周年大會,本來都屬於「和諧」大會,但估唔到理事之一嘅龔耀輝(Ronald)化身成會計界「長毛」,將立法會嘅抗爭文化帶入會計師公會。由於Ronald不滿會長包凱唔畀佢提出減收會費嘅動議,結果Ronald決定玩大佢,利用手上近三百票授權票,先後否決咗「委託核數師」同「確認財務報告」兩項重大議案,寧願大家一鑊熟。

Ronald早兩個幾星期前已經預告想提出減收會費動議,但包凱尋日連討論都唔准,Ronald就做定兩手準備,一早拎咗逾百票授權票預備突襲,而其他理事冇預計Ronald有此一着,所以兩大重要議案都被Ronald一手否決咗。

今次會計師公會被突襲後,聽聞班理事都好頭痛,已經問緊法律顧問點解決。不過,有律師話,確認財務報告同委託核數師都係小事,只要開多次特別會員大會通過就得,其實對公會無乜大影響喎。

至於換屆選舉就平安得多,副會長趙麗娟獲選為會長,陳錦榮同陳美寶就獲選為副會長。趙麗娟係利豐發展董事,早前仲加入咗新民黨,唔知佢將來會唔會選立法會呢?

第一手消息請下載on.cc東方互動iPhone/iPad/Android/Windows Phone Apps