政情：工展商擔憂大遊行
一月一日嘅元旦遊行人數，相信係特首梁振英（CY）民望嘅寒暑表，所以惹來各方高度關注。聽聞同樣喺維園舉辦工展會嘅廠商會中人，擔心去買蝦子麵、買電飯煲嘅市民被計成遊行人士，最尾谷大咗遊行人士數目，變相成為「倒梁」幫兇，所以都唔想民陣喺維園出發，近日頻頻同警方開會商討人流安排，以致警方至今仲未向民陣發出不反對遊行通知書。
工展會每年都吸引數以十萬計嘅市民入場，廠商會副會長吳永嘉（Jimmy）話，今年工展會租晒維園六個足球場，但唔怕工展會嘅人流被當成遊行人士，事關工展會喺足球場搞，而遊行人士就算獲批喺維園出發，都好大機會喺中央大草坪集合，警方應分辨到兩批人士。
封路令人流阻塞
不過，Jimmy就好擔心人流疏導方面會造成混亂，令商戶做少好多生意，因為工展會喺銅鑼灣同天后各設出入口，如果是但一個出入口因為遊行要封路，咁另一邊就會塞死晒。加上元旦日係公眾假期，下午又係入場黃金時間，市民眼見維園咁多人，去工展會意欲即時大減，到時班廠商實呻到樹葉都落，到時都唔知點交代。