政情：爭支持做人大 候選者猛拉關係
港區全國人大代表換屆選舉進入倒數階段，好多候選人都用「揼石仔」方式爭取各方支持，好似青年工業家協會尋日舉行嘅座談會，就有多名候選人同工業界猛拉關係為自己造勢。另一個指定動作係喺宣傳品印載同國家領導人嘅合照，尤以中華總商會前會長霍震寰最犀利，七名新任政治局常委中，佢曾先後同其中六人合照，完全係展示實力。
青年工業家協會座談會共有三十多名人大候選人出席，當中唔少都「自動波」講述同工業界嘅淵源，首先出招嘅係剛卸任青年工業家協會會長嘅顏寶鈴，佢自言青年工業家協會係佢嘅家；前會計師公會會長區嘯翔就自爆曾經做過評判選出青年傑出工業家；前保安局局長李少光仲犀利，話以前曾協助內地港廠商解決糾紛，藉此拉關係。
范太倡中史列必修科
早前鬧得熱烘烘嘅國民教育係今次座談會嘅另一焦點，早前曾因《中國模式》教學手冊捲入國教風波嘅教聯會會長楊耀忠，承認早前學校對推行國教科嚇驚咗，但依家氣氛已經好咗喎。角逐連任嘅全國人大常委范徐麗泰建議，政府把中國歷史列作必修科，唔知教育局會否認真考慮吓呢？