政情：泛民雙重標準干預司法
律政司建議終審法院就外傭居港權案件提請人大釋法，令平靜一排嘅法律界再變得熱鬧。立法會司法及法律事務委員會尋日討論應否召開特別會議討論釋法事件，泛民主派當然要求加開會議啦，但建制派就覺得現時案件已進入司法程序，如果喺立法會進行討論，同干預司法冇分別。其實泛民好似失咗憶，早前基本法委員會副主任梁愛詩發表批評法官言論後，泛民曾批評詩姐干預司法制度，但泛民依家干預司法又得喎，唔係雙重標準又係乜？
民主黨何俊仁（鐵頭仁）要求委員會就人大釋法事件加開會議討論，強調今次釋法事關重大，但動議被建制派群起反對，最終以十二票贊成，十四票反對下否決動議。民建聯主席譚耀宗話，依家唔適宜喺議會討論事件，就算討論都要等終院有判決至得。本身係大律師嘅中華總商會代表廖長江亦認為，案件已進入司法程序，一旦討論案件好可能會影響判決。照計公民黨（公文袋）有幾個大狀，冇理由唔知o架？
就喺呢個時候，公文袋郭榮鏗就撲出嚟話，如果法院審緊單案就唔准討論，咁立法會咩都唔使傾啦！鐵頭仁亦加把口話，立法會只討論釋法原則，唔一定要提到釋法案件。佢哋兩個講到咁大義凜然，但完全唔記得個幾月前，梁愛詩只係喺一個學術講座上，話本港司法界同法官對中港關係缺乏認識，所以有時會判錯案，就係呢一句，結果被泛民鬧到狗血淋頭，鐵頭仁同郭榮鏗同時發炮批評詩姐粗暴干預司法獨立，又要求詩姐收回言論。
終院判決後 立會始討論
既然泛民當時覺得詩姐發表言論會影響司法獨立，點解到佢哋依家又「寬己嚴人」呢？擺明就係雙重標準。尋日泛民同建制派雙方就尋求人大釋法問題拗到唔肯停，最終要委員會主席梁美芬出手調停，令兩邊陣營都即時收聲。梁美芬決定依據「剛果金案」做例子，話立法會可以加開會議討論人大釋法事件，但最快要終審法院判決後先至得，以免影響司法程序。梁美芬做咗主席兩個幾月，終於威番一次。