中環出更：胡應湘夫人頸鏈搶眼
雖然女人愛購物，但對住最喜愛嘅物品，其實可以好專一。卓妮日前喺一個酒會上見到合和主席胡應湘夫人郭秀萍，佢戴咗條好特別嘅頸鏈，係以類似紅寶石嘅珠仔串連而成，非常搶眼，顯得更加高貴。記得冇幾耐前，胡太出席活動時都有戴過呢條頸鏈，睇得出佢對條鏈幾咁情有獨鍾。
胡太話，其實條鏈係由天然珊瑚石製成，佢多年前遊台灣時買落嘅。不過，現時台灣嘅水質受到污染，靚珊瑚已經愈來愈少，依家再去都未必買得到喇。
年尾屬旅遊旺季，胡太話嚟緊會同老公孖住去日本北海道滑雪，原來佢已經滑咗二十年，感染到囝囝胡文新都愛上呢項運動。胡太話，自己好享受旅行，事關可以暫時避開鎂光燈嘅追蹤，過番啲自由自在嘅生活喎。
何志平搞「中美日對話」
同場仲有甚少露面嘅前民政事務局局長何志平，卓妮問佢退咗休之後有乜搞作？佢話繼續專注中華能源基金委員會工作，每年舉辦大型論壇，下月中將會舉行一個「中美日對話」，邀請退休將軍、大臣及學者對談，旨在提升國家嘅軟實力。