中環出更：饒宗頤銅像「平易近人」
國學大師饒宗頤「粉絲」遍布中外，北京雕塑家紀峯近日就為偶像饒大師鑄造一個高一點八米嘅全身銅像。雕像尋日揭幕，九十多歲嘅饒大師精神奕奕出席儀式，大讚銅像栩栩如生。饒大師透露，事前佢對銅像鑄造只有一個要求，就係要「平易近人」，結果製成品令佢相當滿意。
饒大師銅像尋日喺位於荔枝角青山道嘅饒宗頤文化館「天光雲影」庭園正式揭幕，一眾潮州「家己冷」包括許學之、方平、全國政協委員施子清、饒宗頤文化館管理委員會主席李焯芬教授、饒宗頤學術館之友會長王庭聰等紛到賀。
藝術家徒弟出資鑄造
饒大師銅像一派從容，充滿爾雅祥和嘅學者風範，難怪饒大師都豎起拇指讚好。身為作者嘅北京雕塑家紀峯，原來跟過饒大師學寫書法，師徒情深，於是決定花三年時間，自掏腰包為老師鑄造銅像，以七十多歲的饒大師面容為藍本，果然尊師重道。雖然尋日饒大師要坐輪椅出席揭幕禮，但卓妮見佢好精靈，見到好友仲主動握手添。
同場有「藝聚西泠」展覽開幕，展出西泠印社於上月在杭州舉行嘅饒教授書畫藝術特展內嘅精選作品。西泠印社係中國成立最早嘅金石篆刻學術團體，饒大師接任社長，係中國藝術界對饒大師在金石學及書畫藝術上成就嘅肯定。
卓妮