民協立法會「超級」議員馮檢基（阿基）前日突然因病入院，佢自稱睇嘢有疊影，大動作及行路都見頭暈，仲會嘔添，頓時惹起各界關注佢嘅病情，擔心有乜依郁需要就超級議席補選外，亦想到佢未能就特首梁振英嘅不信任動議投票，真係夾都冇咁啱。可能因為咁，阿基尋日就主動向大家派定心丸，喺社交網站上載一幅自己留院嘅相片，仲預告聽日可以重出江湖添。
幅相見到阿基瞓喺病床上，隻右手插滿吊鹽水嘅導管，成個人都好似冇乜精神咁，但佢左手依然高舉拇指，示意自己仲撐得住。阿基幅相喺網上即時被廣泛流傳，好多網友都叫佢慢慢休息，連民政事務局政治助理徐英偉都有慰問。有人問佢係咩病，但阿基似乎唔想透露病情，只係話星期六會復出喎。
估唔到阿基一衝出九龍西變超級議員就即時「Hang機」，按道理如果阿基退下火線，民協應由副主席譚國僑補上，可惜譚國僑唔係區議員，無資格選超級議席，望就望阿基呢個係小毛病，身體健康啦！