政情：葉劉搵樁腳吊高o黎賣
前保安局局長葉劉淑儀一手湊大新民黨，葉太憑自己呢個「人肉生招牌」，去年初成立以來就同好多政界人士「眉來眼去」，有啲係葉太主動伸出橄欖枝，亦有人係「飛來蜢」向葉太「送秋波」，但新民黨疑似吊高嚟賣，幾乎所有「飛來蜢」都睇唔上眼。新民黨寧缺勿濫嘅態度，講得好聽啲就係貴精不貴多，難聽啲就係太過揀擇，認真有辣有唔辣。
新民黨成立至今，先後經歷過兩場大型選舉，基本上超額完成目標，特別係剛過去嘅立法會選舉，翻一番取得共兩席，加上早前葉太又獲垂青加入港府最高決策機構行政會議，該黨風頭認真一時無兩，自然惹嚟唔少飛來蜢希望加盟。據聞立法會選舉前夕，好多政界中人都明示暗示想同葉太「拍住上」參選。
消息指，近日字字珠璣嘅工業界議員林大輝一直對喺新界東直選心思思，殊不知原來佢連港島區參選都曾經心動，曾喺五、六月同葉太初探可能性，開列出嘅條件係佢喺港島排第一，葉太要排第二，認真大想頭，有人就只係當笑話咁聽。另外，亦有人話其實係當時離選舉嘅時間太過緊迫，所以冇認真去考慮呢個建議喎。
求才若渴為區選做準備
據聞南區區議會主席朱慶虹等區議會主席都曾向新民黨敲過門，當時新民黨都以不變應萬變為由，無就此作太多討論。除咗有「飛來蜢」有意加盟新民黨，有傳該黨亦主動出擊搵政治人才，其中一個目標係高票落選立法會新界東議席嘅西貢區議員方國珊，可惜至今仍未有下文，究竟雙方爭啲乜嘢先至可以合作，呢個只有佢哋至知喇。
話時話，新民黨曾被形容為「官場快線」，每隔一段時間就自然流失人才畀政府，葉太喺政圈求才若渴，無非都係想壯大新民黨，特別係為一五年區議會選舉做好準備。不過，搵樁腳太揀擇認真有好有壞，葉太認真要諗吓點樣喺重質同重量之間取得平衡喇。