中環出更：吳嘉瑩創業 億元豪宅變會所
經營鐘錶生意嘅博愛醫院總理吳錦青，多年來奉行「要做有錢人嘅生意」原則，結果賺到盆滿缽滿。最近佢將價值逾一億五千萬元嘅九龍塘喇沙利道六千五百呎四層高嘅豪宅，交畀大女吳嘉瑩（Alyssa）經營度身訂造嘅一站式尊貴私人會所，由美容健身、跳舞、影婚紗相、學韓文到小朋友嘅Play Group，應有盡有。
Alyssa係中信證券分行證券銷售副總裁，老公嘅家族生意做地產，雖然小妮子衣食無憂，但佢唔甘於就此過着少奶奶嘅生活，所以利用閒餘時間初試啼聲創業。曾奪「亞洲星光大道4跳舞吧」季軍嘅李創偉（Catry），都係Alyssa嘅生意拍檔，會所嘅頂層設有跳舞室供Catry教舞，兩位年輕人講起夢想中嘅豪華會所，眉飛色舞，活力十足。
吳錦青視作實驗學校
卓妮見私人會所牆上掛滿畫風清雅嘅畫作，原來全部係吳錦青次女吳嘉琪（Karki）嘅大作。修讀藝術嘅Karki啱啱畢業返港，現時喺香港佳士得拍賣行工作。Alyssa笑稱，妹妹想將會所變成佢嘅私人畫廊添！其實，只要客人有需求，Alyssa就會搵城中最頂尖嘅行內專家合作打造會所嘅服務，不計成本勁玩Cross Over，概念夠晒新穎。
育有三女一子嘅吳錦青話，佢當會所係訓練子女創業嘅實驗學校，體驗做生意嘅甜酸苦辣，為將來接手經營家族喺內地投資興建嘅商場做準備。講起間億元豪宅，原來喺十五年前買入，當時唔使三千萬元，後來吳家更上一層樓搬咗去山頂，間屋就咁丟空咗十幾年，依家升值到一億五千萬元，認真和味。
卓妮