提起李少光，大家會諗到乜嘢？最自然諗到嘅當然係前保安局局長呢一個位高權重嘅職銜啦，其次咯喎，應該係諗到未來港區人大，事關呢一位退休高官雄心不減，已經遞表參加今個月十九日舉行嘅新一屆港區全國人大代表選舉。聽講喎，港區人大全部五十二名參選者當中，李少光得到六百九十五張提名票，榮膺「提名票王」，即係當選嘅機會高唱入雲，除非投票期間又爆出潮流最興嘅「僭建醜聞」，咁就唔知將會發生乜嘢事嘞。
功夫茶無端端搞乜鬼舊官重提呢？無他嘅，原因係李少光其實做過廉政專員，對於香港嘅廉政有一定分量嘅話語權。即係咁，國際組織「透明國際」發表全球清廉指數，全球一百七十六個國家同地區之中，香港排名第十四，比起去年排名第十二下跌兩級，李少光就話嘞，官位不可成為貪腐罪行保護傘，希望藉住參選人大向內地推廣本港反貪經驗。
呢一位前廉政專員到底講緊乜嘢呢？計功夫茶話齋，畫公仔唔使畫出腸嘅，官位不可成為貪腐罪行保護傘，好明顯就係講緊「貪遍省港澳」嘅過氣特首曾蔭權啦，事關全港十幾萬個靠公帑出糧嘅官僚之中，曾爵士係唯一一個能夠依靠官位凌駕法律嘅疑似犯罪分子，鬼叫現行防止賄賂條例刑不上特首咩！
李少光身為一個前度港產包青天，雖然未必一言九鼎，但係起碼擲地有聲，佢都話官位不可成為貪腐罪行保護傘咯，咁現任廉政專員白韞六應該知道點樣做啦。喂，天子犯法與庶民同罪吖嘛，雖然現行防止賄賂條例刑不上特首，不過可以修改啫，將條例嘅約束力擴大至特首咪得囉。
關於僭建是否涉及誠信嘅問題，護主心切嘅梁粉忠僕話喎，無心之失就好比男人急不及待衝入女廁。功夫茶問問大家，信唔信曾蔭權同超級富豪過從甚密係無心之失衝入女廁吖？搭豪華遊艇又係無心之失衝入女廁？搭私人飛機又係無心之失衝入女廁？廉價租用深圳禮賓府又係無心之失衝入女廁？咪玩啦！
講番香港嘅廉潔排名下跌，真係好鬼死悲哀o架。「透明國際」畀香港嘅評分七十七，不但下跌兩級至第十四位，而且遠遠落後於競爭對手新加坡，人哋得分係八十七，全球排第五，亞洲排第一，香港醜死怪呀！
其實，李少光不但應該向內地推廣本港反貪經驗，更加應該向本港推廣本港反貪經驗。意思即係話，前輩應該點醒後輩，反貪首重反貪曾，滅罪先滅保護傘，你任得貪曾逍遙法外？向內地推廣本港反貪經驗只會淪為笑柄o架咋！