骨灰龕位嚴重短缺，在生嘅為幫先人撲個龕位搞到一頭煙，早年曾為過世家人排過骨灰龕位嘅工聯會立法會議員王國興（阿王）尋日喺立法會一個委員會上質問食物及衞生局局長高永文，點解最近和合石新龕位嘅申請方法要抽籤，突然改變當年先到先得做法，仲好火滾話自己當年係親身去灣仔幫先人排將軍澳華人永遠墳場龕位喎。查實將軍澳墳場龕位係屬於華人永遠墳場管理委員會，而高局長講要抽籤嘅係食環署嘅龕位，從來冇試過排隊先到先得，所以兩邊嘅龕位申請自然有唔同處理啦，唔知阿王瞓醒未呢？
