政情:今日你上鏡:好肚餓?

尋日喺柴灣青年廣場舉行嘅施政報告及財政預算案諮詢會有唔少市民出席,當然唔少得有示威者抗議啦,所以出席嘅官員都喺諮詢會後急不及待離開。唯獨特首辦主任邱騰華最有型,竟然去咗諮詢會場對面間舖頭食米線,仲被示威者發現,示威者即時拉隊到舖外示威,其中一名戴住唐英年面具嘅示威者仲帶隊衝入舖內同邱騰華握手添!邱騰華一散會就急不及待咁走咗去食米線,仲要同其他人搭枱,莫非真係好肚餓?