政情：收料站：火辣辣酒吧富二代新寵
要數香港夜蒲熱點，相信中環蘭桂坊會係最多嘅一個地方。最近雲咸街有一間名叫「Socialito」嘅酒吧好旺場，此店開張只有幾個月，裝修充滿南美洲異國風情，專售墨西哥食品，喺香港比較少見。據聞莊士集團太子爺莊家彬（Albert）及前立法會議員楊孝華公子、男裝鞋店Tassels老闆楊哲寧（Jonathan）等富二代放工後不時會去蒲番轉，感受吓南美熱辣辣嘅氣氛。
墨西哥風格現中環
「Socialito」喺墨西哥俚語中，係指一個聚集人群吃喝玩樂、享受人生嘅地方，而呢間Socialito日間係餐廳，晚上則搖身一變成五十年代嘅墨西哥酒吧，有DJ（唱片騎師）打碟及live band樂隊演出。愛熱鬧嘅Jonathan不時同老友落去飲番兩杯，佐以墨西哥街頭小食，好似粟米卷（Taco）、Tostadas烤餅同Pasteles餡餅等。飲品方面，該酒吧提供多款以龍舌蘭酒（Tequila）調製成嘅雞尾酒特飲，甜甜哋好易入口，啱晒怕啤酒苦澀味嘅靚女們享用。