政情：「三十會」李律仁做多哈法官
○三年成立嘅論政組織「三十會」，由一班年輕專業人士組成，近來屢次獲政府垂青佢哋會員加入各大諮詢委員會，據聞近年「三十會」召集人、本身主打金融財經範疇嘅大律師李律仁（Laurence）更加衝出香港，獲卡塔爾多哈嘅金融監管審裁處邀請做後補法官，基本上每年須去當地一至兩次，據聞佢仲係少有嘅亞洲面孔添！
中東的杜拜同卡塔爾近年都大力發展金融業務，有人形容卡塔爾多哈好似內地前海咁，好多創新嘅金融、專業服務都有觸及，對於專業人士更加求才若渴，Laurence被選中就好唔簡單。講開Laurence一手湊大嘅「三十會」，原來已經成立咗九年，成立咁耐佢就出任召集人咁耐，佢笑稱自己係芸芸組織嘅「True Convenor」。
對於「三十會」過去論政時都較為低調，Laurence形容該會一向不太理會市場，最重要係讓不同意見有機會表達，另外佢又大讚會內嘅後起之秀，相信可以繼續注入新思維喎。究竟最終「三十會」由咩人接班，又或者Laurence使唔使繼續坐多一會，呢個就要拭目以待喇。