政情：曾浩輝大計一籮籮
「近日流感病毒於每千人有六十宗附近整固，蓄勢往上尋頂，短期技術走勢偏強，如參考監察圖，平均線已上移至五十五宗關口，年尾前冬季高峰期有機會續往上突破……」仲有十七日就離開政府嘅衞生防護中心總監曾浩輝好風騷，透露大計一籮籮，佢一向在投資市場有斬獲，仲話想拜股評家「青姐」胡孟青為師學炒股，如果佢用講股口脗嚟解釋傳染病走勢，相信都幾過癮。
自從曾世伯同伯母自爆恨飲新抱茶後，曾浩輝繼「神探輝」之後又多個新花名叫「筍盤」，尋日明明係衞生署署長陳漢儀宴請傳媒，但結果被「筍盤」搶晒鏡，個個追問「筍盤」有咩大計。琴技了得的曾浩輝遲啲會為母校香港華仁書院籌款表演，與「校長」譚詠麟合作，屆時譚校長會唱首本名曲《霧之戀》，而佢就負責彈琴。原來讀書時，歌手李克勤係佢師弟，一早已經夾過歌喇。
曾浩輝百足咁多爪，佢自爆對寶石好有興趣，間寡佬屋都收藏咗二百粒，係喺ebay買番嚟嘅，於是想正式讀個課程學鑑賞寶石。究竟點解石頭會成為佢嘅興趣？佢話可能細個睇過媽咪粒鑽石，愈睇愈鍾意。伯母隨便有粒鑽石畀阿仔玩，曾浩輝又邊使捱世界吖！