中環出更：粵劇名伶為博愛出力籌款
社會愈來愈關注長者福利，除咗幾十萬長者將可享有政府提供嘅生活津貼外，博愛醫院都唔執輸，發力為長者夢想成真計劃籌款。日前博愛主席潘德明、總理歐倩美及劉石達等人，齊齊現身位於荃灣嘅「飛燕天地」，與粵劇名伶尹飛燕及囝囝阮德鏘等人，宣傳本月廿三日將喺高山劇場舉辦嘅《孝莊皇后》粵劇慈善夜，到時售票收入將捐畀博愛，齊齊為長者送暖。
當日吸引好多粵劇發燒友及粉絲到場打氣，仲有知名嘅粵劇女配角「二幫王」任冰兒，即係任劍輝嘅妹妹。燕姐好開心，笑稱自己喜事連連、夢想成真，事關《孝莊皇后》係佢最心愛嘅戲劇，佢唔止擔綱演出，仲係第一次做導演。加上最近佢囡囡又添咗名BB女，難怪現場有粉絲投訴話搵唔到佢喇，皆因佢去咗加拿大幫手湊外孫女，愈忙愈開心。
潘德明請長者睇戲
潘德明就呼籲大家買飛入場，一邊睇戲一邊做善事，幫助提升長者嘅快樂指數，等佢哋過個豐盛晚年，佢都會帶頭捐錢贊助，請埋博愛旗下單位嘅長者免費睇戲，當係送上聖誕節禮物。