政府內部最講階級文化，做下屬嘅冇得違反上司柯打，所以有時要發洩不滿，惟有私底下幫高官改花名，一來方便秘密講是非，二來畀人知道咗都死無對證。最近有位副局長都被人改咗個好威水嘅花名叫做「葉問」。不過，叫得花名邊有咁好死吖，原來個花名並非想話個副局長係好打得嘅「葉問」，而係取同音字「頁問」，因為班下屬嫌佢逐頁文件都要過問，好鬼煩呀！
話說呢位副局長，逢親開會時都好似驗屍咁，手上份文件永遠逐頁逐頁咁向下屬發問，問呢頁點解咁寫，又問嗰頁點解少咗啲嘢，只係爭在未問點解用逗號定句號。所以有部分下屬實在頂佢唔順，就幫呢位副局長起咗個花名叫「葉問」。其實呢個名真係唔錯，萬一「葉問」知道咗自己有個咁嘅花名，分分鐘仲以為自己真係好打得，又點會嬲班下屬呢！
除咗煩到冇人有嘅「葉問」外，另一位被起花名嘅問責高官叫做「加零一」，事關佢每次向下屬落柯打時都會叫人做好啲，非常嚴格，所以班下屬私底下就幫呢位高要求嘅高官改個花名叫做「加零一」。唔知大家聽完「加零一」柯打後，會唔會真係做到加零一呢？