政情:公民講場:田二少首炮 港鐵當抓痕

每個人嘅第一次都係好寶貴,好似新民黨立法會議員田北辰(田二少)前日成功首次喺立法會提出動議辯論,建議港鐵票價要由行政會議把關,即係話行會可以調整票價加減幅度,唔使畀港鐵話晒事。今次辯論罕有獲泛民主派及建制派聯手支持,令議案成功通過。田二少當然開心到飛起啦,即時影番張相留念兼擺上社交網站分享。

田二少今鋪成功向港鐵開刀,的確係好開始,但咪咁快開心住,因為呢啲動議辯論係無約束力嘅,即係等於田二少用玩具水槍射向港鐵一樣,就算辯論通過咗,港鐵照舊睬你都有味,繼續加價、無論列車不停出現故障都奈佢唔何。所以講到尾,今次動議辯論只係向港鐵抓痕,小市民繼續承受港鐵加價嘅壓力。

第一手消息請下載on.cc東方互動iPhone/iPad/Android/Windows Phone Apps