政情：成立150周年活動多 皇仁舊生搞校慶晚宴
盛產社會精英嘅皇仁書院，後日會喺灣仔會展大搞籌款校慶晚宴，歡賀學校成立一百五十周年。皇仁舊生會會長于鎮康及校慶晚宴籌備小組召集人鍾創新，為咗籌備晚宴忙到不得了，但講到晚宴一票難求，要臨時加枱兼且一張枱坐足十三人，先至招呼得晒二千四百名同學及校友，有咁多人捧場，所以幾辛苦都無所謂啦！
其實由今年初開始，皇仁就未停過搞慶祝活動，包括話劇表演、推出紀念郵票等，到咗年底嘅重頭戲籌款晚宴，賣飛嘅墟冚情況更加驚人，早前推出一百五十席，即係一千八百張飛，唔使兩星期已經售罄。為咗令更多皇仁仔一齊去玩，大會絞盡腦汁，安排每張枱坐十三人，又勉強增加枱數至一百九十席，終於好似變魔術咁，變多六百個位出嚟，認真唔簡單。
當晚出席嘅校友粒粒皆星，包括金管局總裁陳德霖、食物及衞生局局長高永文、中文大學校長沈祖堯，以及「怪醫」梁家騮等六位立法會議員，高永文及沈祖堯仲會登台獻唱添！為咗籌得更多款項，好多社會名人都捐出拍賣品，包括「富豪飯堂」福臨門捐出酒席券、國學大師饒宗頤捐出筆題「皇者仁風」字畫、十枚陀飛輪腕錶等，相信屆時必定爭崩頭。