讚新丁孖寶講嘢有紋路
不過，工聯會嘅死對頭、工黨議員張國柱，就大讚呢對孖寶講嘢有紋有路，原來係同兩人嘅出身背景有關。
鄧家彪同郭偉強出身工聯會，根正苗紅，點解佢哋嘅背景會令阿柱另眼相看？原來阿柱話呢兩人都係做社工出身，又讀過大學，因此待人處事都比較講道理喎。
阿柱本身代表社福界，社工係佢嘅選民，自然要擦吓班米飯班主鞋啦，但佢呢番言論，亦可理解為暗踩其他非社工出身及冇讀過大學嘅工聯會議員，全部唔講道理！
之前冇同工聯會阿姐陳婉嫻共事嘅阿柱又話，嫻姐火起上嚟真係好好火，加埋民主黨劉慧卿同民建聯蔣麗芸，今屆立法會特別多惡女人，相比之下佢黨友何秀蘭，忽然間變得溫和同溫柔咗好多喇。