政情：七個小矮人掘票夢碎
各大政團總結立法會選舉後，開始為一五年嘅區議會選舉作部署，要開拓新票源最有效嘅方法，當然係開辦事處紮紮實實咁做地區工作啦。據聞以工業界梁君彥為首嘅立法會「七個小矮人」，最近都放下身段，以功能界別議員身份抽房屋署空置嘅屋邨議員辦事處，但呢類辦事處多數位於公屋區，同佢哋想發掘嘅中產票源格格不入，更加係錯配添，空手而回可謂意料中事，莫非佢哋七個齊齊發緊夢？
上屆立法會，香港總商會代表林健鋒（Jeffrey）、梁君彥同鄉議局主席劉皇發係合稱「3L」，後來更組成經濟動力，一直都想增加自身影響力。佢哋喺新一屆立法會仲搵埋地產建造界石禮謙、金融服務界張華峰、工程界盧偉國及西九新動力主席梁美芬四人加盟，變身成為現代版嘅「七個小矮人」，明眼人都睇得出佢哋想有一番作為。
據聞「七個小矮人」最近都靜極思動，除咗密密搵友好加盟做佢哋顧問智囊外，疑似連地區直選都想染指，所以早前派出Jeffrey、梁君彥等四人出擊抽房屋署空置嘅屋邨議員辦事處，搶攤意味認真濃，顯然係想依靠市民大眾嘅支持，增加本身嘅政治影響力。
揀唔落手 空手而回
不過咪以為想搶灘插旗係咁容易，事關房署嘅屋邨辦事處抽籤次序，功能界別議員係排到最後，換言之如果有乜辦事處筍位都畀地區直選議員捷足先登，餘下嘅辦事處位置好極有限。其實「七個小矮人」原本抱住有好過冇嘅心態，有殺錯冇放過都係人之常情，最弊係唔知「七個小矮人」係事忙定係未瞓醒，後期先至發覺去公屋區搵中產票係唔可行嘅，最後嘅結果當然係揀唔落手，空手而回！
話時話，「七個小矮人」齊心去做嘅頭炮鎩羽而回，相信呢個結局都冇人想，但講到尾最緊要係識得吸取教訓，否則下次再出現類似嘅「大烏龍」就更加不能原諒，話唔定「雪姑」激到暈，「連隨大喝一聲你哋快趣瞓！」