中環出更：「台風」襲港 余國春推介客家良品
以售賣國貨為主嘅裕華國貨，近年吹起一陣陣「台風」，五花八門嘅台灣特產愈來愈多。裕華佐敦總店就正同台灣客家重鎮新竹縣合作，舉行「台灣良品在新竹——客家文化及良品展」。日前舉行開幕儀式時，身為客家人嘅裕華董事長余國春及余鵬春兄弟親自上陣招呼賓客，而首次喺香港搞推廣活動嘅新竹縣縣長邱鏡淳，特登送上客家花恤衫畀賓客着上，成個氣氛即刻輕鬆晒。邱鏡淳仲賣花讚花香話，件衫靚過夏威夷花恤添！
余國春話，早前佢同梅州聯會赴台考察，期間到訪客籍人士群居嘅新竹縣，雙方一拍即合。余鵬春就話，今次推介嘅客家良品多籮籮，佢特別鍾意由花生、芝麻及各種果仁磨成粉末嘅客家擂茶，夠晒清熱健康，仲有充足嘅纖維。余家大小姐余小春都有現身，佢話台灣食品夠晒健康，市民食得安心，所以近年裕華售賣嘅台灣貨愈來愈多。
卓妮