中環出更：謝鴻興賽帆船重合作
每逢周末，維港經常出現十幾廿艘帆船揚帆出海嘅壯觀奇景，其實係香港遊艇會每星期舉行嘅帆船比賽。上周六卓妮就喺帆船船群中，發現香港醫學會會長謝鴻興嘅蹤影，原來佢同五名志同道合嘅帆船發燒友參加兩場港內帆船比賽，由紅磡出發到太古城，再到啟德舊機場，然後再折返紅磡終點。當日謝醫生嘅最佳成績係得到第二名，佢講笑話：「好彩得第二，如果攞第一，就要請飲啤酒喇！」
完全唔識帆船嘅人上到船，只係見到謝醫生同佢隊友喺指揮下，拉繩同拉帆，總之拉個不停，有時又一齊坐喺帆船嘅一邊，間中又坐另一邊，真係唔知佢哋做乜。謝醫生話，佢同隊友控制艘船反應要好快，要因應風速、風向同水流，令船身穩定前行，仲要避開其他帆船，加上比賽要快，慢少少都會輸。雖然佢負責控制主帆，但拉帆嘅繩拉緊或放鬆一、兩吋，艘船航行情況就好唔同，真係少啲工夫同合作默契都唔得。
愛團隊精神「坐埋一條船」
謝醫生講得頭頭是道，皆因佢係學會嘅航海隊長，同好多會員都有出海比賽。佢話，維港內比賽，艘船算係穩定，但一出維港以外就風高浪急，所以每次到維港以外比賽都會嘔一次。唔講唔知，謝醫生早喺中學時已經開始玩帆船，跟隨中學老師學習，入大學同行醫初期都好忙，冇時間玩，直至私人執業，空餘時間多咗先至重拾昔日興趣，如果周六得閒，都會出海比賽。
問謝醫生點解咁愛玩帆船，答案就係「好玩」，因為出海要睇天時地利，而且消耗唔少體力，係一種好吸引嘅運動，團隊精神更加唔係其他運動可以學到，真正體會乜嘢係「坐埋一條船」喎！
卓妮