歌仔都有得唱啦，垃圾最可怕，垃圾最討厭。既然係最可怕又最討厭，垃圾應該點樣處理先至好呢？政府多年以來主要係靠堆填區處理垃圾，只可惜香港地少人多，堆填區佔地唔細o架，而且總有一日用完，唔通又要學似前朝政府咁野蠻咩，居然諗到伸出魔爪佔用郊野公園！
將軍澳、打鼓嶺同屯門三個堆填區將於二○一四至一八年相繼飽和，到時候，點算好？點算好？點算好？根據台灣嘅經驗，人哋提倡源頭減廢同資源回收，盡量做到全回收以及零廢棄。當然啦，如果要做到源頭減廢，必不可少嘅手段係垃圾徵費，亦即係用者自付咁解。
環保團體地球之友調查顯示，大約六成半市民支持垃圾按量收費，較今年初增加十三個百分點。至於反對垃圾徵費就有百分之二十五，減少十個百分點。地球之友就話嘞，實施垃圾按量收費逐漸成為主流意見，呼籲政府盡快推行政策，建議未來垃圾徵費係每個家庭每月四十五元。
用者自付有乜嘢好處呢？簡單咁講，一旦棄置垃圾要收費，用家梗係小心謹慎o架啦，從而大幅減少垃圾。就以台灣嘅台北為例吖，自從實施資源回收、強制分類、垃圾不落地同隨袋收費等等政策之後，台北垃圾棄置量由每人每日一點一二公斤減至目前零點三九公斤，減幅達到百分之六十五，回收率由以前嘅百分之二點四增加到百分之四十三。至於市民嘅垃圾費負擔咯喎，由每月大約港幣三十六元減至十三元。亦即係話，台北市民垃圾量減少，同時垃圾費負擔亦減輕。
去過台灣旅行嘅朋友都知道，當地垃圾桶少得出奇，到底係點解嘅呢？正正係因為實施隨袋收費政策，為免民眾偷雞唔畀錢將廢物胡亂棄置，所以垃圾桶係唔會通街擺嘅。
好嘞，假如香港學台灣實施垃圾徵費，大家諗唔諗到有乜問題？你知啦，香港好多人發錢寒o架，萬一為咗慳錢而隨街亂丟垃圾，甚至乎冇人性到高空擲物，咁就瓜得啦！
環保團體綠領行動總幹事何漢威出席電台節目嘅時候指出，倣效台北隨袋收費嘅模式較為可行，市民較易掌握棄置垃圾付出嘅代價，實施初期定價毋須太高，建議每個垃圾袋收三至五元，推算每個家庭每月支出只係幾十元。之不過咁，何漢威促請政府落實垃圾徵費之後亦應該加裝閉路電視，監察市民棄置垃圾情況。
咁講啦，垃圾徵費係不妨一試嘅，收費唔好太高之餘，更加唔可疏於監管，否則香港通街垃圾不特止，仲有可能高空擲物掟死人！