探射燈：餵飼難收科 絕育為上策
要令流浪貓脫離苦海，替牠們絕育是一個可行的方法。獸醫黎昌生坦言，胡亂餵飼流浪貓，會令牠們身處的環境愈來愈差，「應該立即停止，繼續餵先係唔人道！」黎直指，為流浪貓絕育，從而控制流浪貓的數目，以及避免禍延下一代，才是幫助牠們的最有效方法。他稱，餵貓者會令野貓生育率提高，雖然表面上可以救回眼前貓隻的生命，惟牠們誕下的大批貓仔卻可能會活活餓死。
食飽好難捉
不過，黎補充，如想餵飼流浪貓，應考慮只餵飼已絕育的貓，「佢哋（絕育貓隻）通常會畀人剪咗耳角，不過難度在於餵嘅時候，佢哋好多時都成堆衝埋嚟。」
長期參與流浪貓絕育行動的獨立義工謝曉梅也承認，曾有義工餵飼流浪貓後，吸引愈來愈多流浪貓「搵食」，該義工難以「收科」下，只有向她求助。她指，餵飼流浪貓會阻礙推行絕育計劃，「捉貓之前我哋會叫啲義工唔好餵貓，啲貓食飽咗就唔會出嚟，好難捉。」香港群貓會幹事陳靈怡亦指，若有心餵飼流浪貓，「一開始就應該幫佢哋絕咗育先」，以免過量繁殖。