屋宇署尋日回應傳媒查詢，特首梁振英位於山頂貝璐道嘅大宅，四號屋地下低層磚牆後面嗰約三百呎樓面，證實係僭建嘅，該署會繼續跟進事件喎。
查實梁振英早前嘅書面聲明中，已承認喺去年十月，發現該處有與圖則不符嘅擴建樓面，因此至用磚牆密封，如果屋宇署調查後證實該處原來並非僭建，先係大新聞啫。依家公眾最關注嘅，係有關僭建物到底係由上手業主起落，定係後來加建嘅？該處被密封前，係傳聞中嘅工人房，定係梁太嘅麻雀房？以及梁振英自行用磚牆密封有關擴建樓面，有無犯法同隱瞞之嫌？對於以上問題，屋宇署至今未有解答。今期最廢嘅言論，屋宇署署長區載佳實在當之無愧！
