依家啲八、九十後互傳訊息，通常會透過互聯網或智能手機進行，連直接打電話溝通都嫌麻煩。原來我哋班尊貴嘅立法會議員，部分亦已跟隨科技發展「升呢」，由過往開會時透過傳紙仔溝通，改用手機程式WhatsApp傾偈，並且同啲後生仔玩facebook一樣，出現網絡欺凌事件。
過往議員喺舊立法會大樓開會時，為咗同啲坐得遠嘅議員互通訊息，經常會透過秘書處職員傳紙仔溝通。搬去新大樓之後，地方大咗，議員座位亦隔得開咗，傳紙仔嘅需要性就有增無減。不過傳紙仔有個壞處，就係好易畀記者同其他議員睇到，例如早前立法會前秘書長吳文華傳紙仔畀前中總議員黃宜弘，就被指係「通水」叫佢發動「剪布」，成個過程畀電視台影晒。
最近部分議員為咗自己方便同秘密行事，開始喺開會期間改用WhatsApp溝通。其中建制派喺今年九月協調各委員會正副主席期間，就悄悄成立咗個WhatsApp群組互相溝通，後來更發展成用嚟對抗泛民拉布，確保各建制黨派有足夠議員出席會議，防止流會。由於唔係所有建制派議員都有加入呢個群組，據聞有人經常喺群組叫某黨派嘅話事人，控制下一位無加入群組嘅黨友，暗批對方長氣、好煩好大聲等，非常小學雞。