政情：消委會新一姐職業病？
男人等女人係咪自然定律呢？新任消費者委員會總幹事黃鳳嫺（Gilly）可以話你知「係！」話說Gilly上月中上任後，出親街都隨時職業病發，周圍八卦格價，買嘢食又要睇吓包裝上嘅營養標籤。好似佢有次去買清潔劑，藥房每支賣九蚊雞，點知再去超市睇賣貴個幾，要買夠兩支，平均價先同藥房睇齊。咁快變成格價專家固然係好事，但去買嘢時老公等候時間霎時間多咗兩倍，睇怕都要適應吓！
上任總幹事劉燕卿嘅硬朗風格，令唔少人都擔心Gilly能否勝任。Gilly話，過去曾於中電、微軟等唔同性質公司工作，今次要融合新環境唔困難，佢又話消委會啱啱做緊未來三年計劃大綱，預計明年一、二月完成，初步包括會跟進商品說明條例、競爭法等立法工作，亦會研究如何推動市民關注網上購物、冷靜期及可持續消費等。
佢又透露，喺電子化嘅年代，消委會係咪都應該喺社交網站開番個群組，但佢擔心如果有人喺網頁寫投訴，夠唔夠人手去跟進，《選擇》月刊期期點名指摘，又會唔會畀網上打手攻擊呢？