政情：鬍鬚曾賴皮嬉笑
財爺喺預算案估錯數已經唔係咩新鮮事，事先狼來了話會有赤字，揭盅時彈出盈餘扮有「驚喜」，盈餘撥入水浸儲備唔益市民嘅「戲碼」市民愈鬧愈有。財政司司長曾俊華估錯數係一個街知巷聞嘅事實，鬍鬚曾呢期竟搞到被群插仍然愛理不理，搞到平時少罵大幫忙嘅建制派議員都睇唔過眼加入戰團。
喺尋日嘅立法會財經事務委員會會議上，工聯會議員王國興先嚟語重心長一問財爺今年有無新招，點知鬍鬚曾大耍太極，王國興見鬍鬚曾咁唔領情，拋低一句政府唔好過分樂觀就失望而回。
被彈保守 當作讚美
有建制搭台唔領情，跟住就輪到泛民發炮，工黨李卓人話鬍鬚曾做咁多年財爺就被人鬧足咁多年，又彈佢呢個「保守財爺」正一守財奴，一句量入為出、財政審慎，搞到香港未有財政懸崖先有貧窮懸崖。點知鬍鬚曾就笑笑口回敬一句：「多謝李議員歷年提醒，作為一個財政司司長，畀人話保守我覺得係讚美嚟o架！多謝你！」
緊接公民黨郭榮鏗質疑，點解政府唔學美國做一個有深度長遠嘅估測，估吓未來廿年嘅發展開支，點知鬍鬚曾施展軟皮蛇政策，話嗰啲只係「政治掛帥」嘅估算，「廿年預測都係呃人o架！」
再嚟有廠商會代表林大輝接力挑機，問政府今年會估錯幾多，可惜大輝都無功而還，事關鬍鬚曾，佢輕易將責任推到外圍經濟，輕輕一句「外圍經濟差，今年情況特別難」就成功抽身喇！
話會計師都估唔啱
最後搞到委員會主席，身兼行會成員嘅民建聯李慧琼都忍唔住問鬍鬚曾一句，其實政府連年估錯數，究竟當中有咩困難呢？政府又會唔會請個顧問研究吓點解呢？點知自信嘅鬍鬚曾話，香港屬外向型經濟，估算一定有落差，仲話連外面會計師樓嘅預測都唔見得比政府預算準確。即係話打定輸數，點估都係錯o架嘞。
鬍鬚曾又唔使自暴自棄嘅，前排就有會計師樓話，政府今年賣地收入放緩，估計鬍鬚曾今年只係會估錯大約一百億元（咁少啫），可惜鬍鬚曾好似唔多領情，唔通佢今年要重演估錯千億元經典？