中環出更：台灣牛肉麵老行尊來港宴客
一碗熱辣辣嘅台灣紅燒牛肉麵，係好多中港遊客訪台必食之選。喺台灣業界頗負盛名嘅牛肉麵老行尊程班長，日前特登來港一展絕世廚藝，喺私人會所舉辦私家牛肉麵饗宴，廿幾位台灣幫及本港台灣食品代理商聞香而至，眾人除咗飽嘗牛肉麵及滷味，仲有風味獨特嘅酸梅湯，令人回味無窮。
以外賣壽司每件三元殺出一條血路嘅爭鮮（香港）執行長劉桂照都有到場，佢話短短三年間，爭鮮喺本港已有逾廿間分店，不過近年香港租金暴升，前景未敢太樂觀。同場嘅珍珍集團行政總裁鄭榮宗、華記永昌號太子爺陳漢平、新台場老闆陳錦泉都大嘆生意難做。喺銅鑼灣開設第一間分店嘅程班長，明年都可能因加租而搬遷。
程班長話，佢年輕時喺台灣當兵，當時同來自大陸嘅老兵入廚偷師，練就一手好廚藝，佢取名程班長，就係為咗紀念那段當兵歲月。程班長教路話，炮製牛肉麵嘅精髓在於湯底，好多香港食客嫌浮喺湯面嘅紅油太肥膩，其實嗰啲唔係油，而係由三十斤以上牛大骨熬製八個鐘嘅骨髓精華。