中環出更：名人行善大Show才藝
名人圈臥虎藏龍，演藝學院前晚有個「樂韻悠揚燃希望慈善音樂會」，絕對係一場名人騷。演藝學院校董郭永聰（Ronald），開金口獻唱《獅子山下》，已故教育家陳樹渠千金陳燭光（Zandra）就同型男老師David Klar大跳性感探戈，前環境運輸及工務局局長廖秀冬公子蕭偉中（Justin）登上舞台指揮，組合夠晒新鮮。
最令人刮目相看，要數Ronald。佢唱完一曲，再與媽咪郭許雪禮合唱一首《The Prayer》，洪亮聲線，震懾人心。Ronald十八歲就喺悉尼贏得歌唱比賽冠軍，大有條件做歌星，但佢選擇去英國牛津讀法律，依家係律師，唱歌仍然係佢最大嗜好，每逢有慈善演出，都會挺身支持。卓妮見佢喺舞台上忘我演出，秘訣原來係幻想自己坐喺飛氈上，踩住音符唱歌喎。
陳燭光負傷演出
習舞兩年多嘅Zandra呢晚出錢又出力，帶傷演出，婀娜多姿的舞步，博得全場掌聲，一舞輕易籌得近五十萬元，單係佢哥哥陳耀璋，已捐出三十萬元撐細妹。同場表演嘅，仲有「政壇歌王」鄭慕智，一曲《You Raise Me Up》，充分表現其「巨肺」本色。
音樂會靈魂人物，唔少得擔任音樂總監嘅Justin，呢晚出動自己隊樂團演出美妙樂韻，又拎起指揮棒，甚有大師風範。成晚座無虛席，身為音樂會籌委會主席嘅Adler珠寶董事總經理何彭慧嫻（Patti）話好欣慰，二百二十多萬元善款，絕對係爆燈。筆錢將支持突破機構，為四川災後青年提供心靈治療，認真善心。
卓妮