政情：學校名寫啲唔寫啲 胡志偉惹虛報疑雲
政治人物嘅學歷真偽，經常成為政敵搵黑材料嘅最佳地方。我哋最近收到讀者投訴，話民主黨立法會議員胡志偉報稱喺美國威斯康辛大學畢業，但搵勻成間大學嘅畢業名冊都冇佢個名，質疑佢虛報學歷。我哋即刻問番胡志偉係咪真有其事，發現原來佢冇虛報，只係該大學喺當地有第二間分校啫。
投訴胡志偉嗰位讀者，原來去咗威斯康辛大學麥迪遜分校（Madison）網頁搵胡志偉個名，但其實胡志偉係就讀威斯康辛大學密爾瓦基分校（Milwaukee），所以喺麥迪遜分校搵唔到佢個名。胡志偉話，兩間大學都係同一系統，但由於獨立運作，搵唔到佢個名都好正常喎，仲叫投訴人下次投訴前先查清楚。
嫌中文名太長 寫得簡單啲
我哋喺上網發現，兩間大學的確係兄弟校，但前者係最新美國國內大學排名第三十八位，公立大學更係全美排第三。至於胡志偉讀嗰間都唔差，但排名就不入百大喇，似乎名氣上同學術排名都差少少。唔知係咪咁嘅關係，所以胡志偉一直對外講自己係威斯康辛大學畢業就算數呢？佢強調唔係想呃人，只係大學中文全名實在太長，所以先寫得簡單啲喎，既然惹人誤會，今後咪寫番全名囉。