讀者好人有好報 《太陽》免費送《好報》

呢嗱嗱嗱，大家記住呢一個喜氣洋洋嘅隆重大日子喇，今年十一月三十日，內容豐富嘅《好報》橫空出世，第一階段逢星期五隨《太陽報》附送，仲會喺全港各區旺點免費派發；第二階段每周出版兩日，適當時候仲會分拆為兩疊，甚至獨立出版添。亦即係話，讀者有福了，好人有好報！

多多有好人嘅讀者或者會問，派通街嘅免費報紙已經成行成市啦，部分即派即棄即刻變成拾荒一族嘅囊中物，《好報》有乜嘢吸引力可以令到讀者一讀再讀呢？回答呢個問題之前，功夫茶首先要擦一擦東方報業集團嘅金漆招牌。《東方日報》長期高踞全港銷量冠軍位置，憑嘅係實力，靠嘅係口碑，東方出品毫無疑問係信心保證。同出一系嘅《太陽報》質素超凡，不斷創新，家陣隨報附送《好報》，簡直係如虎添翼，好上加好。

好嘞，講番即將強勢登場嘅《好報》本身，之所以有吸引力，原因好簡單，基本上三個字講完：好猛料。有人可能會問，點樣先至能夠做到好猛料呢？嗱，咁就一啲都唔簡單喇，事關要辦一份好猛料嘅雜誌式報章，需要有龐大嘅編採隊伍配合，仲要嘔心瀝血，精益求精，當中嘅複雜程度外人係無法想像嘅。

不如咁啦，等功夫茶略略預告一下《好報》有乜嘢猛料。政商名人追蹤追訪，藝人明星內幕秘聞，消閒娛樂美酒佳餚，全球各地奇聞趣事，只不過係其中幾個重點咋，其他包羅萬有嘅豐富內容源源不絕，有待讀者自己發掘。

《好報》仲有一個特色，你知啦，家陣狗仔爆料文化逐漸流行，既然社會已經接受，《好報》不妨大爆特爆，務求做到更好更快更狠更辣，點止狗仔文化咁簡單。大家想知道更多內幕秘聞，咁就要留意嘞，追擊藝人名人，好料盡在《好報》，絕對唔係其他免費報章或者八卦雜誌可以相提並論。總而言之，好猛料，好勁料，好爆料，好熱鬧，好八卦，好流行，好滋味，好鬼索，《好報》好好好！

開講都有話，好人有好報。好人手執一份精彩絕倫嘅《好報》，當然係心安理得好意頭，但對於嗰啲做咗虧心事嘅壞人嚟講，醜聞隨時被踢爆，睇怕有得震冇得瞓！

各位明白未？功夫茶不厭其詳講多次，今年十一月三十日，亦即係後日，內容豐富嘅《好報》橫空出世，強勢登場，一到星期五就好人有好報，至於壞人咯喎，理鬼得佢現眼報！