政情：神探輝唔急搵老婆
衞生防護中心總監曾浩輝（神探輝）宣布辭職後，仲有大概一個月就可以脫苦海，去法國南部酒莊歎世界喇！曾經喺衞生署同神探輝合作無間嘅醫院管理局行政總裁梁栢賢（PY），尋日特登邀請神探輝上去佢主持嘅醫管局內聯網節目「神探輝話當年」，當然唔少得提到佢沙士期間成功搵到病毒源頭嘅過程啦，聽到醫管局班員工Fans津津有味，不知幾唔捨得佢！
「防疫大將」神探輝九二年開始喺衞生署做醫生，直至○七年接替轉投醫管局嘅梁栢賢，擔任衞生防護中心總監到依家。講到喺衞生署最難忘嘅事，一定係○三年擔任社會醫學顧問醫生期間撞正沙士，要帶隊上京華國際酒店查案咁查，搵番病毒源頭出嚟。講到「學嘢」仲開心，九七年全球爆禽流感時，難得有機會去美國疾病預防及控制中心深造，增值唔少。
對於之前被阿爸阿媽「出賣」展示陳年生活照，仲大爆催極佢都唔結婚，神探輝似乎唔介意，仲講笑話：「篇報道好似徵婚廣告！」PY就打蛇隨棍上問佢，辭職之後係咪主力去搵老婆？神探輝依然唔心急，話會去完法國酒莊品酒後，再去美國同澳洲探朋友，但應承一年後會返香港再服務廣大市民喎！PY仲提醒佢：「成班Fans等緊你返嚟！」