攝錄鏡頭有好多用途，既可以拍攝精彩絕倫嘅得獎電影，亦可以拍攝令人髮指嘅犯法行為。好似台灣新鮮出爐嘅金馬獎咁吖，如果冇攝錄鏡頭，演技再精湛嘅影帝影后全部無用武之地。至於網民常用嘅攝錄鏡頭，隨時拍到變態司機瘋狂駕駛，作為呈堂證據成功入罪嘅情況都唔算少o架。
之不過問題係，刀可救人亦可殺人，攝錄鏡頭如果落入立心不良嘅人手上，往往變成害人不淺嘅缺德工具。好似形容猥瑣嘅鹹濕佬咁吖，攞住攝錄鏡頭猛咁低炒，為乜呀？無非為咗滿足佢拍攝裙底嘅獸性囉。
講到呢度，睇過《東方日報》頭條報道嘅大家可能會問，因乜事幹消防車同救護車會加裝攝錄鏡頭嘅呢？莫非公職人員有意進軍電影業，贏個金馬獎過過癮？計功夫茶話齋，當然唔係啦。紅車白車加裝攝錄鏡頭名義上係方便調查，實際上會侵犯市民私隱，講得通俗少少就係偷窺。
成件事係咁嘅，消防處靜靜雞喺部分消防車同救護車加裝攝錄鏡頭，事前冇任何公布或諮詢，直至本報查詢先至話，攝錄計劃旨在調查涉及處方車輛嘅交通意外。人權組織當然質疑啦，消防車輛意外寥寥可數，攝錄理由不充分，病人組織不滿加裝鏡頭冇諮詢。至於前線消防員同救護員工會咯喎，同樣質疑處方加裝鏡頭嘅用意，擔心監察員工製造白色恐怖先至係真正目的，救護員職方已向個人資料私隱專員公署投訴。
好嘞，大家試想想紅車白車最有機會遇到嘅攝錄題材係乜嘢呢？可能係春光乍洩嘅醉酒嬌娃，可能係衣衫不整嘅車禍傷者，亦有可能係疑夫包二奶失控狂斬嘅呷醋人妻。簡單咁講，攝錄鏡頭隨時拍到人哋唔想曝光嘅片段，你話嘞，咁樣同偷窺有乜嘢分別呢？
前線消防員同救護員嘅憂慮亦都唔係杞人憂天o架，你知啦，Big Brother Is Watching You係幾咁得人驚嘅一回事，上頭話鏡頭用作調查交通意外，點鬼知有冇其他陰謀o架，萬一車禍現場有人喺鏡頭前面露出笑容，你老屈佢冷血唔尊重死傷者咁點算好？
功夫茶身為傳媒工作者，平時最討厭人哋話拆菲林，不過一旦涉及侵犯私隱，咁就情況完全唔同晒。即係咁，唔該消防處拆鏡頭！
咪住先，人權組織另外又批評，近年紀律部隊不斷喺所有車輛加裝鏡頭，可以話全方位監控市民，紀律部隊嘅措施只係從行政角度出發，唔尊重人權。既然係咁，功夫茶講多次，紀律部隊拆鏡頭！