普通市民搭飛機出遊，大部分都係坐經濟艙，皆因一張頭等艙價錢足夠坐好幾趟經濟客位喇！不過，香港有位出晒名小器兼貪盡海陸空嘅退休「貪官」，在任時唔見佢用吓腦幫香港做實事，淨係識得發明無限多嘅賤招搵着數。有人同我哋報料，踢爆呢位貪官為咗免費升級坐頭等艙嘅慣用招數，聽到佛都有火。
有內地負責接待過氣「貪官」嘅人透露，「貪官」每逢遇上要自己畀錢嘅旅程，就會先指使隨從，出聲要求訂購頭等客位，自己就扮慳儉買經濟客位。去到機場辦理登機手續時，「貪官」就跟足劇本做戲，扮講笑話：「我啲隨從都坐頭等，不如幫我升埋頭等啦！」講到咁出面，航空公司職員都買你怕啦，一陣被佢投訴連份工都冇埋。
「貪官」仲有一式更加慳家嘅招數，就係搭車上深圳，由深圳機場出發去內地城市，明明香港有航班直飛目的地，「貪官」都要大費周章行遠路。點解？原來佢唔止貪圖內地內陸航線嘅平機票，更重要係內地航空公司好識做，見到乘客係過氣「貪官」，唔使等佢出聲做戲，都識自動波幫佢升呢到頭等艙啦！
「貪官」先前貪盡海陸空嘅招數已曝光，估唔到連出唔到公數嘅旅程，都有幾招升級豪華遊嘅獨家秘笈。難怪愈來愈多人睇唔過眼爆大鑊，十足過街老鼠，人人喊打。