勞工及福利局局長張建宗（小肥張）出名好人，尋日佢要出席一個有關男士侍產假嘅會議，但去到時個會已經開到尾聲，所以心急如焚嘅佢見(車立)門一開，就急急腳趕入會議室。由於(車立)門行到會議室嘅路程好短，小肥張幾步就行晒，搞到在場守候嘅電視台記者走晒雞，於是大喊：「張局長，我哋影唔到呀，可唔可以再行多次呀？」小肥張一聽到記者咁問，就迅速地回頭一望，跟住徇眾要求返轉頭，再以慢動作行多次，仲要全程保持和藹可親嘅笑容，十足行Catwalk咁款，認真搞笑。
