政情：廢人廢語：發叔真的想退位？

鄉議局主席劉皇發年屆八十七，過去已連任多屆主席，最近一、兩屆改選都傳出佢會放棄連任。距離下屆改選仲有三年，尋日發叔被問到屆時會否退位讓賢時，佢就話唔再選，聲言自己做咗好多屆，唔想再做喎。發叔慨嘆，最幫得手嘅副主席張學明又唔肯做主席，但佢又唔會捧個仔劉業強去做，費時被人話「家天下」喎，所以依家都唔知搵邊個接班好。

其實發叔話唔做鄉議局主席，都唔係新鮮事，但對上兩次選舉都搞到自己好似眾望所歸咁，焗住再做主席穩住大局，所以今次結局係點，我哋即管放長雙眼睇吓囉。

至於咩人接到班，發叔就拋出幾大條件，當中除咗「夠經濟能力」呢項外，其他都係講咗等於無講嘅條件，例如話要做事夠熱心、人緣好，但呢啲條件，乜唔係做咩位都要具備嘅咩？

第一手消息請下載on.cc東方互動iPhone/iPad/Android/Windows Phone Apps