生產力促進局幾年前被審計署報告力數十二宗罪，包括行政管理紊亂、遺失大批資產同未經批准向部分員工亂發花紅。事隔三年，呢個大花筒部門無吸取教訓，仲借頭借路趁四十五周年使咗大量公帑搞形象工程。不過，呢種企圖用大花筒手段去洗脫大花筒污名嘅做法，點會得到市民認同吖！
生產力促進局今年踏入四十五周年，上月底就公布咗一系列更新品牌嘅形象工程，包括更改標誌同設計兩款卡通人物代言人Tec及Biz，一個代表科技發展服務、一個代表企業管理服務，向大眾同年輕人推廣生產力促進局，希望畀市民一個年輕同嶄新嘅感覺。當被問到使咗幾多錢時，該局發言人就話，由於涉及商業秘密，唔可以講出嚟喎，但設計係透過公開招標競投，絕對公平、公開、公正。
雖然局方對使錢神神秘秘，但根據業內人士透露，以上設計最少用咗七位數字，仲可能未計製作短片費用，即係納稅人最少唔見咗一百萬元。
該局大花公帑之餘，總裁麥鄧碧儀嘅年薪亦都高人一等，竟然有成三百二十幾萬元，足足等於佢哋所有臨時僱員加項目僱員嘅五分之一人工，真係拍得住啲問責局長嘅人工喎。