政情：鮑參翅肚 污染人大選舉
港區全國人大換屆選舉異常激烈，逾五十人爭三十六個席位，觸發一場前所未有嘅「拉票戰」，但有人大參選人拉票手法無所不用其極，向有份投票嘅選舉團成員請食貴價鮑魚、魚翅，手法實在令人側目。不過，其實大部分人大參選人都勤力頻頻打電話拉票同拜訪團體，以及出席各界別舉辦嘅推介會。
其中漁農界尋日就舉行推介會，據聞有近廿名有意參選者出席，包括中聯辦社工部部長張鐵夫、新界社團聯會理事長陳勇、南旋集團主席王庭聰、香港註冊中醫學會會長馮玖等。不過，最令人意外係前香港青年聯會主席姚祖輝都有捧場，咁啱得咁蹺，身兼考評局主席嘅全國青聯副主席陳仲尼最近對係咪參選人大要再作考慮，唔知兩者有無關連呢？
港區人大尋日繼續接受各界報名，至少有九人親自報名參選，包括首次參選嘅前保安局局長李少光、九龍社團聯會會長陳振彬、城市大學校董會主席胡曉明、中華總商會常務會董梁海明及招商局副總裁李引泉，各人都搵晒啲忠實支持者去撐場，好似手持一百一十七個提名嘅李少光，就喺近十個舊拍檔陪同下報名。本身係九龍社團聯會代表嘅高寶齡唔選，尋日就聯同油尖旺區議會主席鍾港武等人力撐接班人陳振彬出選。
Ann蔣做「護夫」代言人
至於李引泉就搵同屬中資機構代表、中銀吳亮星同中旅盧瑞安組成中資三人組名單，尋求各界嘅相互支持，其中盧瑞安目前取得二百二十八個提名。不過，倘要數最合拍同具娛樂性嘅，首推初次選人大嘅梁海明，佢全程有太太蔣麗芸（Ann）做代言人，幾乎在場記者有乜提問，阿Ann都幫手回應，而且仲落力推介丈夫喺和解同仲裁方面做咗大量工作，認真「護夫心切」。