中環出更：兩明哥力撐 非主流音樂
香港作為一個國際都會，藝術文化係不可缺少嘅軟實力。由歌手黃耀明（明哥）發起嘅文藝復興基金會，上周六於西九龍文化區舉行一場長達七小時嘅馬拉松式音樂會，邀請咗兩岸三地嘅非主流歌手輪流獻唱，供上萬名市民及年輕人免費入場觀賞。開設投資公司嘅商會青委陳光明（Johnny）都有去湊熱鬧，佢坦言愛聽非主流音樂，皆因去除商業味嘅音樂，聽起來更有神韻，更有深度。
積極培育文化界新血
今次音樂會邀請咗來自台灣原住民歌手巴奈、全才創作人陳珊妮，內地有來自潮州海豐嘅組合五條人、民謠歌手周雲蓬及小河、搖滾音樂人左小祖咒，香港嘅代表則有林一峰、黃靖以及組合Atomic Bubbles，當然仲有搞手明哥啦！佢哋各有演繹風格與特色，唯一共通點係非主流文化。
明哥話，音樂會只屬基金會嘅其中一個項目，其餘仲有一連五星期嘅電影節及文學活動，希望能夠提供一個平台畀唔同地方嘅歌手互相交流，「內地同台灣經常舉辦戶外音樂節，香港就好少見，戶外感覺同喺紅館睇show好唔同，係另一種生活方式。」佢透露基金會將招募導演、音樂人開班發掘年輕人潛能，培育更多文化界新血。
今次基金會排除萬難，成功舉辦音樂會，其中最大難題係籌集資金。有份贊助嘅Johnny因機緣巧合下認識基金會，佢極力推薦別具一格嘅非主流音樂，「唔少主流音樂藝術都帶有負面情緒，非主流則帶來正能量，聽落好舒服，有助減壓。」當日見Johnny差唔多首首歌都跟住哼唱，就知佢幾咁樂在其中啦。
卓妮