政情：反對聲不斷 陳仲尼未定選人大
港區人大代表選舉即將舉行，各參選人都把握機會出席尋日舉行嘅人大選舉會議拉票。不過，有人漏夜趕科場，有人卻疑似「走回頭路」，講緊嘅係身兼考評局主席嘅全國青聯副主席陳仲尼（Rock），據聞佢尋日非但無同有份投票嘅選舉團成員攞提名，事後仲有風聲傳要再考慮係咪選人大。
被指恐「染紅」考評局
阿Rock因為被傳出有意選人大，結果被教育團體聯署要求佢辭任考評局主席一職，避免人大與考評局主席兩個職位會有角色衝突，亦擔心會「染紅」考評局，萬一將來試卷題目又被發現夾雜內地色彩，自然會入佢數，亦令政府添煩添亂。
有消息話，阿Rock仍未決定選人大，而且有意轉趨低調，避免再惹起爭議。亦有傳聞話佢對外仍然話希望友好留起提名表，但承認要時間再諗吓。我哋就此向阿Rock查詢，佢承認要「所有情況都全面考慮」，又稱未作最後參選決定前，唔想浪費大家嘅提名表喎！