社民連立法會議員梁國雄（長毛）尋日去咗香港教育學院同半百學生對談，學生見到尊貴嘅議員固然興奮，仲有同學仔話特登預早到場「朝聖」添。不過，長毛就話，其實立法會只係一個議員各自表述嘅吹水「講壇」，旨意立法會推動制度變革？咪玩嘞！事關《基本法》對議員提出議案嘅限制，令立法會議員嘅立法權力名存實亡，即使議員吹水辯論得幾咁熾熱，淨係開行個焗爐，但又唔放料入去，又點會焗到蛋糕呢？
既然議會爭取民主冇用，長毛話未來似乎都係要靠公民社會，透過外力逼立法會推動改革。但佢又話，立法會係咪傾到普選方案都仲係未知之數，如果唔得嘅話，咁唔該請當日有份支持政改方案嘅泛民主派搵個代表辭職謝罪，仲好輕鬆咁話：「過去錯，依家啱咪得囉！」
立法會財務委員會今日第五度審議長者生活津貼撥款申請，至於能否進行表決就要視乎長毛會否拉布，政務司司長林鄭月娥日前就親自致電游說長毛「高抬貴手」，但長毛表明會繼續拉布。
林鄭親自游說佢都不為所動，難怪長毛都話：「我諗林鄭以後，唔會再打畀我o架喇！」