中環出更：抗智能手機潮 業界創新技術
智能手機風行全球，一部手機乜都可以做齊，令唔少行業面臨大洗牌，攝影及光學製造業就係其中之一。匯聚攝影、光學及電子製造業界精英嘅光機電行業協會，日前舉行新一屆理事就職禮，由「光電儀器大王」黃克競創辦嘅寶源基業副董事長羅台秦接棒做會長，逾百名政商界好友及業界翹楚都去送祝賀。提到競爭激烈嘅營商環境，個個都呻難做，話技術創新係唯一出路。
以生產望遠鏡及放大鏡聞名嘅寶源基業主席戴澤良話，現時佢哋為世界知名品牌代工，例如德國蔡司等，所以要時刻保持最精準嘅技術，才能保持競爭力。協會副會長兼三和科技總裁嚴惠霖好有同感，所以佢睇準時下潮人時刻同朋友分享嘅心態，發明咗具備十幾種專利嘅防水外殼，只要將相機及智能手機擺入去，就可以喺四十米深水底影相，並且即時將精彩相片上載到社交網站。咁緊貼潮流，難怪訂單接到手軟。
磅秤產量冠絕全球嘅「磅王」、香港電器業協會理事長查毅超都嚟撐場，佢最近忙緊為外展訓練學校籌款，仲話訓練有助提高年輕人嘅膽識及團隊精神，好值得支持。近排人氣急升嘅扶貧委員會成員黃友嘉匆忙到場，佢話最近瞓身競逐下一屆港區全國人大，要逐一寄信拉票，好唔得閒。
港台未來可加強合作
台北經濟文化辦事處處長朱曦等台灣幫都去撐場，點解，因為羅台秦係台灣人嘛。朱曦透露，去年三月日本地震及海嘯後，唔少日本科技公司探詢將廠房搬到台灣，港台業界未來可加強合作，佢好願意做溝通橋樑喎。
卓妮