中環出更：Sabatini 郭炳湘愛足20年
富商名人至愛嘅意大利餐廳Sabatini，眨眼間登陸尖沙咀帝苑酒店二十年，餐廳上周舉行生日派對慶祝，創辦人Sabatini兄弟遠道由羅馬飛到香港，認真畀面。酒會上，新鴻基地產非執董郭炳湘、意大利駐港領事代表、創辦人Sabatini兄弟Francesco Sabatini及Silvestro Sabatini一齊切蛋糕，場面喜氣洋洋。
大廚特別為一眾超級貴賓預備一頓驚喜晚餐，餐單由Sabatini兄弟及餐廳副總廚Andrea Oreste Delzanno一齊設計，總結餐廳過往最受歡迎，又最能凸顯Sabatini風格嘅菜式，仲將時令食材如矜貴無比嘅白松露加入菜餚，讓賓客品嘗有「白色鑽石」之稱嘅矜貴美饌，以味蕾重溫餐廳二十年歷史。
Sabatini兄弟咁有心思，難怪郭炳湘早已將餐廳封為至愛。佢憶述當年暢遊意大利時，深深被Sabatini嘅美食佳釀吸引，決意將真正傳統羅馬風味帶到香港。轉眼二十年，餐廳仍然保持高水準，郭炳湘應該飲得杯落喇。