政界中人好多都有權有勢又有錢，尤其係唔少男政客都會染上惡習，最常見就係出外偷食，屋企嗰件又唔要，偏偏鍾意食街外嘢貪過癮。好似政界嘅「格仔人」咁，份人鍾意偷食不特止，仲諗住借外人過橋，方便畀人踢爆後都冇手尾跟，將偷食罪行推得一乾二淨。當然「格仔人」尋歡假手於人，唔係講緊埋門嗰一腳啦，而係講緊電召佳人上房呢個秘密過程。
「格仔人」份人出晒名百足咁多爪，不時都要返內地開會，呢個時候佢就特別多需要，但佢一有需要時就會搵老友幫手，首先會畀個「外賣」特別電話號碼呢位老友，然後叫老友用自己手機叫「外賣」，約好件「外賣」喺某酒店房間等候，之後校啱時間，「格仔人」就會大搖大擺咁去酒店梳乎，全程不留痕迹，亦冇人知佢做過乜，於是乎就神不知鬼不覺，繼續風流快活。
據講「格仔人」份人乜嘢「外賣」都啱，可以用一個「濫」字來形容，而且仲經常食過翻尋味，多次用上述招數搵朋友幫手叫「外賣」，搞到個老友都頂佢唔順疏遠佢，梗係啦，做朋友做到好似扯皮條咁，真係搭飛機啦！其實「格仔人」仲有鮮為人知嘅一面，大家請看下回分解喇。