包公豈可毀廉政 青天不容蔭霸權

未入正題之前,先同大家講個笑話。小朋友問:「點解警察開警車捉壞人嘅時候,都要警笛長鳴?唔通唔怕壞人一聽到警笛就雞咁腳逃走?」老叔父答:「上級單位檢查之前,一般都會事先通知下級單位。」

呢個笑話嘅意思就係話,兵捉賊未必係真的,往往只係一場扯貓尾嘅角色扮演。既然係咁,廉政專員公署話要去調查前特首曾蔭權涉及嘅貪腐醜聞,大家又點睇呢?計功夫茶話齋,下級單位檢查之前,事先通知上級單位,唔係冇可能o架。

呢嗱嗱嗱,淨係睇一件事已經聞到一陣古怪味道。湯顯明同曾蔭權老友鬼鬼,貪曾○七年委任湯顯明接替羅范椒芬出任廉政專員,到咗○九年湯顯明已屆法定退休年齡六十歲,哈,貪曾居然一反常規額外委任多三年喎,湯顯明一直做到今年六月三十日,啱啱好同曾蔭權步伐一致齊齊卸任。

因乜事幹要以破格嘅人事任命共同進退呢?咁就要講番轟動港澳嘅歐文龍八億元世紀巨貪案。本報獲得驚人內幕消息,澳門前運輸工務司司長歐文龍貪污嘅具體情節只係浮出冰山一角,涉案嘅香港富商劉鑾雄以及羅傑承只係先頭部隊,背後仲有多個本港超級富豪逍遙法外,而呢幾個超級富豪同曾蔭權又有千絲萬縷嘅關係。簡單咁講,富豪老友記多籮籮嘅貪曾同歐文龍貪污案結下不解之緣,一大班利益集團淵源不淺,喺咁嘅情況之下,當然最好由一個信得過嘅「曾朋友」負責為廉署把關啦。打個譬喻吖,假如廉署出動捉壞人,起碼大鑼大鼓警笛長鳴,畀機會壞人聞風先遁吖嘛。

好嘞,廉政專員家陣已經換人,白韞六走馬上任,小市民仍然要問,喂,話查話查都查咗大半年啦,幾時先至披露貪曾案情呀?幾時交代會唔會正式起訴呀?又話廉潔奉公係香港嘅核心價值,又話「香港勝在有你同ICAC」,拖咗咁耐都冇一個說法,白韞六會唔會又係另一個「曾朋友」o架?

所以難怪議員、學者以及前廉署要員徐家傑異口同聲,群起怒斥貪曾敗壞香港聲譽,同時要求立法會運用《權力及特權法》傳召相關人等解答重重疑團。舉個例吖,曾蔭權點解要喺敏感時刻豪遊澳門呢?因乜事幹又會同劉鑾雄胞弟劉鑾鴻參觀涉及歐文龍案嘅「御海‧南灣」地盤?最重要嘅仲係,身為港產包青天嘅廉署,究竟有冇同流合污呀?萬一廉政毀於廉署手上,咁就真係諷刺到極!

中央政府改朝換代,新領導人習近平一上場都信誓旦旦話要反貪啦,如果香港連內地都不如,咁就愧對列祖列宗咯。總而言之,包公豈可毀廉政,青天不容蔭霸權!