政情:慢必自爆戀愛經歷

人民力量立法會議員陳志全(慢必)早前正式出櫃,但原來佢鮮為人知嘅戀愛生涯充滿傳奇。慢必喺尋晚播出嘅一個網上電台節目上大談戀愛經歷,由大學一年級嘅初戀講到最近選舉期間嘅失戀,仲分享咗佢對愛情嘅睇法添!慢必透露,原來佢大學時嘅樣貌好似已故歌手陳百強(Danny),所以當時大學教授或同學都唔理佢個真名,而直呼佢為Danny。

慢必憶述,當年第一次喺沙灘見到個男仔,就一見鍾情,結果兩人開始拍拖,但佢初初只係「小三」身份,四年後先至做「正印」,最後佢哋相愛咗十二、三年,皆因慢必好專一。慢必仲話,佢同呢個男朋友經歷過好多,所以一直認定對方係永遠喺埋一齊嘅對象,但直至游水教練嘅出現,令佢同呢位男朋友十幾年嘅關係有所改變。

慢必話,當時學游水,漸漸就鍾意咗教練,「嗰時十二月學游水,得十四、五度,因為真係好有動力」,其後兩人仲住埋一齊添,但游水教練並非同性戀者,所以佢只好單戀對方。慢必近年曾經有過比佢年輕十六年多嘅男朋友,同埋一個一齊咗五年嘅男朋友,佢話九成關係都係佢愛對方多過對方愛佢,因為佢太易愛一個人喇,而且認為喺每段關係都唔可以畀自己有後悔嘅機會,所以歌手黃耀明嘅一首曲《我這麼容易愛人》正係佢嘅主題曲喎。

第一手消息請下載on.cc東方互動iPhone/iPad/Android/Windows Phone Apps