長者生活津貼撥款一役，因為工聯會同泛民聯手拉布，令全港四十萬長者到依家未能受惠。究竟工聯會咁做流失幾多支持者，從港大最新嘅「十大政團」調查就知一二。民調顯示原本喺一哥地位嘅工聯會，經長津一役後即跌落第三位，跌幅係十大政黨之首。如果佢哋繼續唔肯表態，相信得分有排跌。
港大個調查由本月八日去到十五日，啱啱係立法會財委會第四度審議長津之後嘅時間，工聯會得分由五十一點一分，大幅降至四十九點六分，畀街工同民協爬上第一同第二位。工聯會喺呢個問題上進退失據，由大力反對七十歲以上有資產審查，到依家唔敢出聲，更唔敢表態投咩票，令工記支持者大失望。
同樣係拉布，社民連同人民力量嘅支持度不跌反升，當中社記升幅最高，由三十四點八分升至三十七點四分，點解會咁呢？道理好簡單，工聯會明明係建制派，又扮到泛民咁激，當然失分。即係好似踢波咁，你明明做後衞負責防守，又懶叻跑去做前鋒射失晒啲波，球迷當然唔妥你啦。今周財委會本來係輪到傾剪布嘅「五加二」動議，但都讓路畀長津先，希望工聯會盡快回頭是岸，支持長津啦。